Quan las hèstas de Pascas arriban, qu'es lo moment per los corsaires de s'encaharir, que va caler afrontar lo bestiar cornut...
Mes un estiu, dab quauques esmerits qu'anorem se premenar hens lo país deu Tursan, que volèm véder lo jòc landés, l'escartur hens lo « zig » quan la vaca hadè lo « zag »! lo sautaire suu cap cornut, la volada de l'anjo, lo vira-barquin sus la Margarida, lo cordaire e sa garnura, que credí aver tot vist, dab lo maire, lo deputat e lo curè, que n'i mancava pas sonque l'avesque!
E lo pleitajaire hens l'ulheta : « cent francs pour Janòt, cinquante francs pour Ninòt !»
E la vaca que hulèva, qu'èra maishanta la garça! Mes pardí, lo tipe que s'estirèva davant era, que li hadè véder lo vènte, que s'amassèva d'aquiths patacs quan se trobèvan au zig, e qu'en tornèva demandar lo tipe! Los espectators que se trucavan hens las mans, mes quau prohèra!
E puish lo pleitejaire que dishót « la première partie du jeu landais se termine, nous allons faire un quart d'heure d'entracte! »
Òc, qu'i avè un vielhòt asseitat per plat de jo, que se tiené lo vente dempuish ua pausòta, hadè pas sonque arríder, que se luvèt, se gahèt l'escalèir, jo que'u seguivi, puishqu'èra l'enter-heita...
E que vau enténer per-devath los seita-cuus en beton : «Ah ah ah! Hilh de garça, hilh de garça! »
Jo que pensèri, que diu estar malaud lo vielh, ... e puish, pas mei arren!...
E puish tot sobte : »Hilh deu diable, hilh deu diable! »
Alavetz que me hiri véder, sabem pas jamei,çò qui pòt arribar?---Atz daun d'ajuda? --- qu'èra aquí cap-baishat, semblava ocupat dab sas duas mans :
« Ah hilh de garça, que me carré trobar un cotèth o un cisèu, aquò que me hèi mau, que ne pòds pas saber! »
---E ben, que vau anar cuélher lo medecin que li disi! ---
«Naní, que n'èi pas jamei vist un pegalhàs atau de ma via, que vorí véder la gojata deu peraquet, aquera que m'a vendut ua culòta : « A fermeture éclair, c'est très pratique quand vous êtes pressé, que m'a dit, c'est nouveau, et vous serez habillé comme un jeune, la mode --- dans le vent !... »
Mes aquò, que n'es pas briga aisit, las maishèras que s'an barrejat, e jo que m'èi cagat hens la culòta, lo barolh que s'es desbartenit ... e que put au vent!...